il non dal lûc
Curiositâts
I magrêts o prâts magris
Il prât magri al è l’habitus vegjetâl tipic di dute la Alte planure furlane. Estensions di prâts magris e arits, secs che a dan al paisaç un caratar di stepe. A son la continuazion des ‘marsuris lombardis’ ma a diference di chestis a son metûts su substrâts glereôs plui fuarts. Ancje par ce che al rivuarde il clime, culì al presente di râr fumatis e, duncje, la radiazion dal soreli e je plui eficiente tant che tes zornadis calmis e cence aiar, e lis escursions termichis tra dì e gnot a son fuartis. Po dopo, rispiet ai prâts de Padanie, la ploie e je plui bondante. L’ambient, ancje se di prin bot al somee uniformi, viodude ancje la plane des conoidis teraçadis, che i da al paisaç une note di “delicade malinconie”, al presente invezit une composizion floristiche variade e interessante, dut altri che puare di elements. La flore tal so complès e ven des ariis gjeografichis orientâls alpinis (Iliric e Pontic), ma ancje cun endemisims dal lûc. In chescj magrêts, di fat, si cjatin un grant numar di specis di jerbis che a rivin di soreli jevât ma a risintin ancje dal inflùs dal Sud dal Mediterani e di chel alpin dal Nord.
Cussì al dîs Livio Poldini: “I Magrêts a àn costituît in passât il lûc dulà che si son incuintradis e si son metudis une parsore di chê altre un numar di specis che a rivin dai cuatri ponts cardinâi” (36).
La plante plui tipiche dai magrêts al è il scuari, Crysopogon gryllus o Andropogon gryllus, une graminacie, une jerbe che e dure plui agns, che e à une dimension tra i 50 e 100 centesims cun lidrîs fassicolade, cuntune gjambe robuste, fueis lineârs e sutilis, flôrs violacis cun floridure tai mês di Jugn e Lui.