il non dal lûc
Li dongje…
La plaçute cu la vecje latarie
De Braide par vie Monte Nero – toponim volût dal podestât Pieri Somede dai Marc par magnificâ la Grande Vuere – in pôc plui di 200 metris si rive in place Dalmazie, inte Plaçute. Rivant, a man çampe o vin l’edifici de vecje latarie fat sù tal 1935, in timp di ‘Fassio’ e di ‘Autarchie’ dulà che prime a jerin i orts dai Bernardis. La istituzion de latarie dut câs e jere une vore precedente. Si veve scomençât a lavorâ insiemi il lat al inizi dal secul, e tal 1906 e nas la prime latarie in vie Monte Nero te cjase prime dal puarton di Juri. Po dopo la latarie si è trasferide a metât borc di Mieç, te cjase clamade ‘di Cosean’ par vie che al jere a stâ Dosso Luigi, clamât apont Cosean. Fin a pôcs agns indaûr, su la puarte di chê cjase si leieve ben la scrite ‘Caseificio’. Cuant che i ambients a jerin deventâts insuficients, si veve dât cors ae costruzion de latarie in place. La gjestion e jere simpri stade dificile par vie che lis aziendis agriculis no vevin, fin ai agns sessante, un grant numar di vacjis (in medie 4 o 5 par stale) e duncje la cuantitât di lat lavorât a rivave a pene a paiâ il casâr.
De seconde metât dai agns sessante, cul sburt e cui aiûts de Regjon Autonome Friûl- VJ, ancje culì la zootecnie di lat e jere floride, tant che tai agns dal taramot (1976) la latarie e lavorave 30 cuintâi di lat in dì. La crisi e rivà subit dopo cu lis gnovis tecnichis di produzion. Lis aziendis plui grandis a començarin a adotâ une alimentazion cul ‘silomais’ che al faseve un lat pôc adat aes vecjis tecnichis di caseificazion ancjemò presintis in latarie e il formadi otignût si sglonfave e al veve un savôr particolâr par vie des fermentazions no controladis. No si è volût, o no si è stâts bogns, di cambiâ la maniere di trasformâ e duncje lis aziendis plui produtivis si son gjavadis par conferî il lat tes grandis latariis che propit in chê volte a jerin daûr a nassi in regjon. Il risultât al fo che, cence lat, la latarie tal 1978 e à sierât, restant par cualchi an dome recapit pe racuelte dal prodot e daspò nancje chel.
Vuê l’edifici al è passât, no cence cualchi dificoltât juridiche e burocratiche, al Comun che cuntun finanziament regjonâl lu à ristruturât e destinât a Centri Civic pe frazion di Tombe. La part sot, dulà che a jerin i locâi de latarie, e je stade dade in gjestion, dal 2009, ae Pro Loco di Tombe. I spazis al prin plan dulà che une volte al jere il ‘Dopolavoro’, a son stâts trasformâts in sale cunvignis.
Il Poç
Ta place sul imprin dal borc Injù (vie XXIV Maggio), si pues viodi il Poç, la uniche risorse di aghe potabile pe comunitât di Tombe, fin cuant che tal 1954 al è rivât l’acuedot dal CAFC. Al è stât fat, cussì e dîs la tradizion, viers il 1830 insiemi cul cjampanili. Des misuris dal pêl de aghe, la profonditât e risulte di cirche 50 metris. Di fat la altece a nivel di campagne e je di 94,17 m sul nivel dal mâr (snm). Il valôr minim de piezometriche, des misuris fatis de Regjon dal 1967 al 1986, al risulte di 36,28 m snm; chel massim di 50,84, chel di mieç di 44,27 m snm. Il toc plui profont al è sgjavât tal conglomerât.
Curiositâts
Sorenons a Tombe
La place, cu la latarie e la canoniche dal Capelan, e jere il centri dal paîs, sedi dal pont di viste economic ma ancje sociâl, lûc di incuintri pes feminis che a levin a cjoli aghe tal poç, a cjoli il sîr, a fâ formadi o a fâ la spese tal alimentârs di Bice e Almo; pai oms che a bevevin il tai li dal ‘Dopolavoro’. In sumis, al jere un pont di socializazion par dutis lis fameis che si cognossevin par non, anzit par sorenon. Nus pâr just ripuar¬tâ chescj sorenons cussì come che a son stâts rancurâts tai prins agns 80 dal Nûfcent.
Sorenons a Tombe (1981)
Base | Carlot | dal Neri | Flichi | Momi | Pelane | Seroi |
Beàns | Chirogjo | Davìde | Foscjàt | Mucule | Perasso | Sucar |
Bis | Cjargnel | di Braide | Giuanàt | Mulinâr | Pividôr | Tabagjel |
Blanc | Cjarbonâr | di Gjelmo | Gnento | Mussine | Pleche | Tavin |
Boadice | Cjavon | di Nâni | Gnèur | Pains | Popon | Tessarin |
Bombo | Cjavonìts | di Šel | Grinte | Pajon | Prènar | Tìnaro |
Briscje | Cosean | di Tavio | Grion | Palonio | Rassadure | Trepul |
Cagon | Cragnuline | Diaul | Gue | Panson | Re | Venansio |
Cantinele | di Francesc | Drito | Marchete | Parùs | Rodean | Vigjel |
Carete | dal Moc | Fari | Midiu | Patìs | Salarìn | Voglit |
I canâi di irigazion e i lavadôrs
In Braide, propit su la crosade tra la strade che e ven di Tombe e e va viers il mulin e chê blancje che e va a tramontan, dilunc de Ledre al esisteve un lavadôr sul canâl dal prin comizi, doprât des feminis par smondeâ vistîts e bleons.
Tal 1929, dal canâl secondari di San Vît de Ledre a son stâts derivâts trê comizis di irigazion che a cjapavin in chê volte 268 etars dant aghe a scoriment a 196 ditis. A vignirin fats trê comizis che a permetevin la minude distribuzion de aghe a “pêl libar” midiant di canaletis in tiere batude che a levin daûr i confins une vore iregolârs dai cjamps, garantint a ogni bocje une puartade di 150-180 litris al secont. La distribuzion a lis culturis a vignive tai mês estîfs, di Jugn a Setembar a scoriment, e soredut tes cumieris, daûr di oraris prestabilîts su la fonde de superficie dal cjamp e cun turnis di dîs dîs.
Il prin comizi, chel plui a soreli a mont, al cjapave la aghe de Ledre in localitât Baraçuts, al leve jù in Braide, in Sebide, al Paradîs e al finive tal Comunâl; il secont, chel tal mieç, al cjapave la aghe in localitât Cividines (daûr de cjase di Bertin e di front de ostarie dal Drito, al lave jù in Argilaris e tai Baraçuts Grancj e Piçui, al passave li di Patìs, tal Belìn, ta Selve, tai Vencjârs e ta Stradate dulà che al finive viers Grovis. Infin il tierç, chel plui a soreli jevât, al partive di parsore il mulin di Bunel, al scjavaçave il stradon, al passave in Cividines, in Trois, te Bolgjarie, par San Roc, tas Frosanes par finî tal Ponton.
Su chestis canaletis, in ponts strategjics, a jerin stâts fats i lavadôrs. Un in Braide, un te Selve, un tai orts di Nâni, un là di San Roc e un tal Borc Injù, denant de cjase di Pleche.