il non dal lûc
Il non al ven dal paîs di Blessan e duncje par chei di Tombe a jerin i cjamps dongje di chel paîs. Blessan al è un non prediâl, ven a stai il Blexianum, la aziende, il praedium di Blexius, cul sufìs in -anum. Cun dute probabilitât al è leât a un toc di centuriazion che al jere stât assegnât a Blexius.
Tai prins agns 2000, sui cjamps di Sud Ovest e jere previodude la escavazion di une gjave di glerie che e veve di gjavâ il materiâl fin a une profonditât spropositade. Il proponint al veve za començât a comprâ i tocs di tiere e avanzade la domande in comun. Par fâ cuintri a chê iniziative al nassè un comitât popolâr spontani che cuntune bataie sintude e inteligjente al à rivât a blocâ l’iter e a fâ sì che no si tocjassin chei cjamps.
Curiositâts
Il Roiat e lis Laviis
Lis aghis sieradis e blocadis tra un cercin morenic e chel altri e vegnin jù traviers il Cuar e il Cormôr che a son propit i doi cors che a puartin fûr chês aghis che se di no a restaressin a formâ sfueis, palûts e lâcs (come chel di San Denêl o di Ruvigne che al è un dai ultins restâts). Lis aghis di ploie che invezit a colin su lis faldis dal cercin plui meridionâl a rivin a val e si pierdin tes gleriis de plane.
A son lis Laviis, riuluts che a àn aghe dome in coincidence cun ploiis fuartis. In chest câs sul imprin a àn un cors violent e dopo la fuarce des aghis si smamìs e si dispierdin in agârs che pal solit a vegnin doprâts tant che stradelis di campagne. La fuarce de aghe leade ae pendence dal prin trat de corse si piert cul rivâ sul plan e il riul al manten la puartade fintant che al passe tal teren plui fin (arzile e belete) dal dipuesit glaciâl. A esistin un grum di chestis Laviis; chês che a interessin il teritori dal comun di Merêt a fasin riferiment a dôs in particolâr. Chê plui impuartante e je la Perarie (dal latin Petraria) che e racuei lis aghis tal bas a Sud Est di Feagne a une altitudin di 180 metris snm; e côr jù tal prin toc di buride intun jet avonde definît, ae altece de Ledre e e cjape il non di Anfore, e dongje San Jacum e devente il Roiat. E passe a soreli jevât di Plasences dulà che e mude il non in Marine e dulà che il so cors al è pôc plui di un fossâl e al ven doprât normalmentri come stradele, e côr jù a Est di San Marc dulà che e torne a jessi clamade Roiat, fintremai a Blessan. E va jù dopo tal avualament jenfri Varian e Vissandon, dulà che il non al devente Lavie (di Gjalarian), e passe Basilian e il cors al finìs spandint lis aghis in sfueis e fossâi dongje dal cjastelîr Las Rives di Gjalarian, dopo une corse avonde significative di passe 16 chilometris. Di solit e je sute, e e puarte aghe dome in ocasions di ploiis fuartis cuant che, come tal 1864 e tal 1920, e rive a fâ dams pençs tai paîs alagâts.
Chê altre Lavie, plui a soreli a mont, e je la Madrisane che e cjape vite a Nord di Bataie, e tocje Rusclêt, e jentre a Sunviele e si piert in fossâi e sfueis tai Prâts de Badie ae altece dal cjastelîr di Savalons, dopo un percors di siet chilometris. La Madrisane in ocasion di ploiis fuartis e devente ancje recapit des aghis de Viuce che e ven jù di Rivis Darcjan cul non di Coroncon, che a sô volte e cjape lis aghis de Lavie di Sunviele, dal Siul e dal Fossâl dal Pasc.
Ancje chestis laviis di solit a son sutis. Ma se lis ploiis a tegnin dûr, lis aghis in plene de Madrisane a corin dilunc de strade di Cjaurêt viers Merêt e, culì, traviersant un curtîl, si butin tal Cuar. Memorabile, ancje in chest câs, la plene e la aluvion dai 20 di Setembar dal 1920.