il non dal lûc
I esperts di toponomastiche a disin che il non “codis”al pues vignî intindût tant che strissulis di teren lungjis e stretis. In chest câs o pensìn aes “Codes” tant che al teritori di partignince de Vicinie dal paîs di Tombe, ma insom dal confin cul teritori de Vicinie di Blessan. Il significât duncje al sarès “ultins cjamps”, codis di Tombe, li che al finive il teritori di Tombe e al començave chel di Blessan. O savìn, di fat, che ogni paîs al veve un teritori di competence gjestît de Vicinie, la assemblee dai cjâfs famee. Semplificant, o podìn dî che il model des vilis te Ete di Mieç e fintremai ai nestris dîs, prime de agriculture industriâl, al veve i orts ator de place dulà che a jerin il sfuei, la glesie, il tei de Vicinie e lis cjasis, po dopo a cerclis concentrics, simpri plui a larc, a jerin i cjamps semenâts, i prâts, i passons e di cualchi bande ancje i boscs. Par rivâ tai cjamps, lis stradis a partivin a rai de place tal mieç dal paîs fintremai insom dal teritori di chê comunitât e a lavin a incuintrâsi cui cjamps e cu lis stradis di chê altre vicinie.
Curiositâts
La centuriazion
Rome e rive uficialmentri te aree che cumò e ven clamade Friûl tal 181 prime di Crist cuant che Publio Scipione Nasica, Lucio Manlio Acidino e Gaio Flaminio, mandâts dal Senât, a fondin une colonie militâr su la Natisse in teritori dai Gjai, che li a vevin za une citât: Akileja.
Une des primis robis che a fasin e je la centuriazion, val a dî la sudivision dal ager ator di Aquilee e fin aes culinis in tocs regolârs midiant liniis dretis e tra di lôr perpendicolârs, (Kardines Nord Sud, Decumans Est Ovest) e une misurazion rigorose de tiere. Il reticul al à une direzion di 22° SSO-NNE. Lis tieris cussì dividudis a vignirin assegnadis ai colonos che a jerin veterans di vuere, centurions e pedons. Chei terens, in plui di cualchi câs, a cjaparan il non dal proprietari. A son chei che in te toponomastiche a son clamâts i prediâi. Par esempli Blessan: teren di Blexius, Flaiban: teren di Flavius, cul sufìs in -an se il proprietari al jere di origjin latine. Pantianins: terens di Pantilius, Martignà: terens di Martin, cul sufìs in -ins, -ans (à) se il proprietari al jere za presint te gjernazie celtiche che si jere messedade cence grancj fastidis cui gnûfs rivâts.
La centuriazion di Aquilee che e veve il Kardo principâl te strade Julia Augusta, che e partive di Aquilee e e leve viers Nord, e fo fate ancje tal teritori dal comun di Merêt e ancjemò in dì di vuê si puedin intraviodi sul teren lis olmis di chestis liniis. Un dai Decumans ancjemò ben visibii tal nestri teritori al è chel che di Grediscje di Sedean al va a Blessan passant par Pantianins, doprât ancje come viabilitât Est Ovest. Al è un trat dret par 11 chilometris che dal mieç di Grediscje al côr viers soreli jevât e che intal percors al mostre coincidencis interessantis a Pantianins tal gnûf cimitieri, cu la glesie tal mieç de cortine e cul vecjo cimitieri, disponûts ae stesse distance un di chel altri (16).