il non dal lûc
Li dongje…
Il paîs di Merêt
Merêt di Tombe al è cjâf lûc dal comun dal 1807, cu lis frazions di Pantianins, Plasences, San Marc, Savalons, Tombe e cul abitât di Cjastelîr.
Il paîs al à 630 abitants. Dal pont di viste civîl, te Ete di Mieç al jere feut dai Valvason che culì a aministravin la justizie e lis cuistions jurisdizionâls. Pes cuistions eclesiastichis, la glesie di San Denêl e Ustin, logade te cortine a pene spostade dal centri dal paîs, e dipendeve de plêf di Moruç, di dulà che si è stacade, deventant vicjarie curade ae fin dal XVI secul.
La cortine stesse, dulà che vuê al è il cimitieri, e je stade un centri abitât di lungje frecuentazion. Pieri Somede dai Marcs al dîs adiriture che il lûc al podeve jessi stât in epoche protostoriche un cjastelîr fluviâl, metût come che al è dongje dal Cuar (42). Cheste ipotesi e podarès jessi sufragade dal non toponomastic di Merêt. La teorie latine, che fin cumò e je chê lade di plui, sufragade ancje di citazions medievâls, le fâs derivâ di Meleretum (an 1296: Meleretum apud tumulum), lûc dulà che si coltivavin miluçs.
Agnul Floramo invezit al viôt un Mali Hrad, di derivazion slave, ven a stai piçul (Mali) vilaç fortificât, come Grediscje, Gridiscjute e v. i., che a àn la base Hrad che e vûl dî paîs, vile, vilaç. Di sigûr i latins a àn frecuentât il lûc che cul rivâ dai barbars al è stât fortificât, deventant cortine dulà che si platavin i abitants ancje dai Vicus di Madone di Sterp, di Cjaranducis e – forsit – ancje dal Baracêt.
A son stadis cjatadis ancje olmis langobardis. Di fat a son stadis rinvignudis armis e reperts riferibii a chel popul. Certificade ancje in epoche medievâl la presince slave, tant che al esist ancjemò il Borc dai Sclâfs.
Simpri te Ete di Mieç, tal lûc a son presints i Agostinians che a contribuiran a rimeti in sest i lûcs dopo des scorsadis dai Ongjars e che dopo il 1358 si spostaran a Udin.
Tal 1713 e fo començade la costruzion de gnove glesie par interessament dal Cjaluni Daniele Bertoli e di dute la famee dai Bertoli che e ritignive la vecje glesie di san Denêl e Ustin in cortine insuficiente a tignî dute la int di Merêt e scomude pe distance dal paîs.
E je dedicade a san Michêl Arcagnul e ai sants Ermacore e Fortunât.